გორის საკონსერვო ქარხანა კულა დაგვიკავშირდით | Geo | Eng | Rus

რა არის შაქრიანი დიაბეტი?

შაქრიან დიაბეტს ჯერ კიდევ ძველ ეგვიპტეში, ჩვენს წელთაღრიცხვამდე 170 წელს იცნობდნენ, მაგრამ იმხანად დიაბეტით დაავადებულთა მკურნალობა შეუძლებელი იყო, ვინაიდან ვერ ადგენდნენ დაავადების მიზეზს. ავადმყოფები განწირულები იყვნენ. მხოლოდ მე-19 საუკუნის მიწურულს გახდა ცნობილი, რომ დაავადება კუჭქვეშა ჯირკვალს უკავშირდებოდა, მაგრამ კიდევ საკმაო ხანი გავიდა, ვიდრე ტორონტოში ახალგაზრდა ექიმები ძაღლის კუჭქვეშა ჯირკვლიდან გამოყოფდნენ განსაკუთრებულ ნივთიერებას, რომელიც, როგორც აღმოჩნდა, სისხლში შაქრის შემცველობას აქვეითებდა.

ამ ნივთიერებას ინსულინი უწოდეს. ეს 1921 წელს მოხდა, ხოლო 1922 წლის იანვრიდან შაქრიანი დიაბეტით დაავადებულმა პირველმა პაციენტმა დაიწყო მკურნალობა ინსულინის ინექციებით, რამაც მას სიცოცხლე შეუნარჩუნა.

 

დღეს შაქრიანი დიაბეტი ერთ-ერთ უმთავრეს სამედიცინო-სოციალურ პრობლემად მიიჩნევა. დღესდღეობით მსოფლიოში 120 მილიონამდე დიაბეტიანია, ხოლო 2025 წლისთვის, მედიკოსთა პროგნოზით, მათი რიცხვი 260 მილიონს მიაღწევს.

მატების ასეთივე ტენდენციაა საქართველოშიც. 2002 წლის მიწურულს ყოველ 100000 კაცზე 1078,9 დიაბეტით დაავადებული აღირიცხა, სულ - 47164 კაცი.

შაქრიანი დიაბეტი ეს არის ნივთიერებათა ცვლის დარღვევა, რომლის დროსაც ადამიანის ორგანიზმს არ შეუძლია ნორმალურად შაქრის (გლუკოზის) შეთვისება, რის გამოც სისხლში შაქრის დონე იზრდება. სხვადასხვა მონაცემით, შაქრიანი დიაბეტით დაავადებულთა საერთო რიცხვი მსოფლიოში 120 მილიონამდეა, რაც დედამიწის მთელი მოსახლეობის დაახლოებით 1,5%-ს შეადგენს. მათგან 85-90% II ტიპის შაქრიანი დიაბეტის წილად მოდის. შაქრიანი დიაბეტის კლინიკური გამოვლენა ხდება მაშინ, როდესაც დაშლილია ბეტა უჯრედების 80-95% და ინსულინის დეფიციტი ყალიბდება. I ტიპის შაქრიანი დიაბეტი, ანუ ახალგაზრდული დიაბეტი, მიმდინარეობს ინსულინის სრული უკმარისობით, რაც პანკრეასის ბეტა უჯრედების 80-85%-ის დესტრუქციას (დაღუპვას) მოსდევს. ამის მიზეზი უმთავრესად ვირუსული ინფექცია და აუტოიმუნური პროცესებია. განსაზღვრულ როლს ასრულებს გენეტიკური განწყობაც.

 

II ტიპის შაქრიანი დიაბეტი, ანუ მოზრდილთა დიაბეტის განვითარებაში ორი ტიპის ფაქტორი მონაწილეობს: მემკვიდრეობითი და გარეგანი (სიმსუქნე, ორსულობა). საყურადღებოა, რომ ამ ტიპის დიაბეტით დაავადებულთა 80%-ს ჭარბი წონა ან ამა თუ იმ ხარისხის სიმსუქნე აღენიშნება.

 

დიაბეტი ქრონიკული დაავადებაა, რაც იმას ნიშნავს, რომ მისგან განკურნება შეუძლებელია, მაგრამ შესაძლებელია - და აუცილებელიც - მისი კომპენსირება, მარტივად რომ ვთქვათ, იმ მდგომარეობამდე მიყვანა, როდესაც იგი ორგანიზმს ზიანს ვეღარ მიაყენებს. ადვილი მისახვედრია, რომ მხოლოდ დიაბეტის კარგი კონტროლი გვაძლევს ხანგრძლივი და სრულფასოვანი ცხოვრების გარანტიას.

 

I ტიპის შაქრიანი დიაბეტის მკურნალობისას აუცილებელია ინსულინთერაპიის კომბინირება კვებისა და ცხოვრების შესაბამის რეჟიმთან, II ტიპის დიაბეტის შემთხვევაში - ცხოვრების ჯანსაღი წესი, წონის კორექცია ან ინსულინთერაპია. საზოგადოდ, მკურნალობის ტაქტიკა ყველა პაციენტისთვის ინდივიდუალურად განისაზღვრება.

 

ყველას, ვისაც შაქრიანი დიაბეტი აქვს, უნდა ახსოვდეს, რომ მთავარია კვების რეჟიმის დაცვა, რაციონში იმ პროდუქტების ჩართვა, რომლებსაც ექიმი შეურჩევს, ასევე - სტრესისა და გადაღლისთვის თავის არიდება და ძილის რეჟიმის მოწესრიგება. თუ ამ ყველაფერს გაითვალისწინებთ, შაქრის შემცველობა სისხლში თანდათანობით დარეგულირდება და ადამიანი მეტნაკლებად ჯანსაღი, ნორმალური ცხოვრების წესით იცხოვრებს.

პროდუქცია:
ცხელი ხაზი:
+995 370 272000
ავტორიზაცია | რეგისტრაცია
მომხმარებლის სახელი:
პაროლი:
დამიმახსოვრე